Skíðað í Náttfaravíkum

Náttfaravíkur er afskekktur staður staðsettar á skaganum milli Eyjafjarðar og Skjálfanda og standa þær fyrir opnum Skjálfandaflóanum vestanvert. Draga þau nafnið sitt af landnámsmanninum Náttfara en talið er að hann hafi átt setu í víkunum um einhvert skeið.

Naustavík
Horft yfir Flateyjardal

 

Víkurnar eru fjöllum og björgum skorðaðar á þrjá vegu en á þeim fjórða blasir við opinn Skjálfandaflóinn. Tignarleg náttúran lætur engan ósnortinn en víkurnar eru girtar frá Köldukinn með snarbröttum svorfnum fjöllum sem ganga til sjós sem gerir leiðina í víkurnar að smá fyrirhöfn. Áður fyrr var hægt að komast í víkurnar á fjöru en er það ógerningur í dag og því varla fært þangað nema á fjallaslóða á sumrin, vélsleða á veturnar eða þá sjóleiðina.

Í víkunum er eyðijörðin Naustavík og er þar í dag óviðhaldið tvílyft steinhús og tilheyrir jörðin bóndunum að Björgum í Köldukinn.

Bændur að Björgum aðstoðuðu við flutning
Bransalegur ferðamáti
Sótt á brattann frá fjöru til fjalls

Vorið 2020 héldum við vinirnir á kayak sjóleiðina út í víkurnar í þeirri von að geta skoðað víkurnar á skíðum og skíðað einhverjar góðar línur. Víkurnar ganga inn í Víknafjöll og standa reisuleg fjöll á við Skálavíkurhnjúk 1129 m og Grímlandsfjall ásamt skemmtilegum fjallgarði sem ramma víkurnar inn.

Ferðin byrjaði með nokkrum símtölum dagana fyrir til Hlöðvers bónda á Björgum. Kíktum við svo í kaffi til hans en manngæska Hlöðvers og hinna ábúendanna að Björgum er öllum öðrum til eftirbreytni. Aðstoðuðu þau okkur að ferja kajakana og vistirnar niður að ósum undir Köldukinn þar sem snjóflóð hafði fallið í veginn fyrr um veturinn og hann því ófær óbreyttum bílum.

Við tók sigling meðfram bröttum bjarghamri Köldukinnar og áleiðis inn í víkurnar með nokkrum stoppum á leið til að skoða okkur um. Dvöldum við í nokkra daga á staðnum, skíðuðum og nutum kyrrðarinnar. Óhætt er að segja að ferðin hafi verið eftirminnileg en allt það sem skíðamaðurinn leitar eftir að vori var uppfyllt. Veðrið var með besta móti, færið eins og það gerist best og útsýnið frá fjallstindunum var hreint út sagt ómælt. Náðum við nokkrum góðum rennslum í fjöllunum í kring og eyddum kvöldunum við varðeld, siglingar eða láum yfir landakortum.

Varðeldur og bransasögur
Fögur er fjallasýnin
Kristján Sveinsson skíðar með Skjálfandafljót í bakgrunn

Fjallaskíði fyrir mér er gott tækifæri til að kanna sjaldfarnar slóðir en sjaldan er sú vísa of oft kveðin að nauðsynlegt er að gera það í sátt og samlyndi við þá sem að staðirnir tilheyra.

Heimildir:

Morgunblaðið. (2000). Náttfaravíkur. https://www.mbl.is/greinasafn/grein/569072/