Sumardagskrá Ferðafélags unga fólksins

Ferðafélag unga fólksins er deild innan FÍ sem er sérstaklega ætluð fjallagörpum á aldrinum 18 – 25 ára. Í sumar verður umsjón í höndunum á Gunnhildi og Agnesi en þær hafa báðar lokið Fjallamennsunáminu við framhaldsskólan á Höfn. Dagskrá sumarsins hefur litið dagsins ljós og er hún ekkert minna en glæsileg. Fyrsta gangan er núna á sunnudaginn í Reykjadal og býður vegan búðin uppá grillveislu að göngu lokinni. 

Hér er hægt að skrá sig á viðburðinn.

Fyrsta ganga Ferðafélags unga fólksins er í Reykjadal næsta sunnudag. Ganga, bað og grill!

Þeir sem eru meðlimir í FÍ ung fá ferðir á sérstökum afsláttarkjörum og það verður að segjast að þau eru ansi góð. Ýmsar ferðir verða á dagskránni í sumar svo sem hinn klassíski Fimmvörðuháls, gönguferðir á fell og fjöll í nágrenni höfuðborgarinnar og fyrir þá sem vilja láta reyna á klifurhæfileika sína verður boðið upp á spennandi ævintýraferðir í Öræfin þar sem gripið verður í kletta og ísinn hamraður undir leiðsögn reyndra klifrara. 

Við hvetjum alla áhugasama til þess að kynna sér málið, reima á sig skóna og drífa sig út!